ТОШКЕНТ, 28 июл — Sputnik. Ўзбекистон Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати (ИИВ ЖХД ЙҲХХ) йўлдаги дислокация тушунчасидан воз кечади. Бу ҳақда президент Шавкат Мирзиёев Фарғона шаҳридаги ИИВнинг кенгайтирилган ҳайъат йиғилишида маълум қилди.
“Барча йўл-патруль хизмати ходимлари учун маҳаллаларни қамраб олувчи жавобгарлик ҳудуди белгилаб қўйилади”, - деди давлат раҳбари.
Йиғилишда “Йўл ҳаракати хавфсизлиги – жамоатчилик назоратида” тамойили асосида йилига камида икки марта ижтимоий сўров ўтказиш йўлга қўйилиши таъкидланди.
Энг хавфли йўл ва чорраҳалар харитасини шакллантириб, уларни тартибга солиш учун:
нечта светофор ёки қанча узунликдаги йўл тўсиқлари керак;
қайси ҳудудларга ер усти ва ер ости пиёда йўлаклари зарур;
ҳаракат хавфсизлиги учун жиддий хавф туғдираётган “яма” ва “гармошкалар”ни таъмирлаш учун қанча маблағ зарур, деган саволларга аниқ ҳисоб-китобларини бериш топширилди.
Мутасаддилар ва барча вилоятлар ҳокимларига бир ой муддатда консультантларни жалб қилиб, ҳудудидаги энг хавфли йўл ва чорраҳаларда тартиб ўрнатиш лойиҳасини бошлашга кўрсатма берилди.