ТОШКЕНТ, 17 июн — Sputnik. Тошкентнинг Сергели ва Бектемир туманларида пилот лойиҳа асосида янги қозонхоналар қуриш ишлари бошланди. Бу ҳақда “Veolia Energy Tashkent” компанияси хабар берди.
Мазкур инновацион лойиҳа 130 дан ортиқ кўп қаватли уйлар ва 30 та ижтимоий объектни очиқ иситиш тизимидан ёпиқ иситиш тизимига ўтишни ифодалайди.
Қозонхоналар
© Veolia Energy Tashkent
Лойиҳани амалга ошириш жараёнида энергия тежамкор замонавий ечимлар қўлланилади:
иқтисодмайзер газли қозонлар;
дастлабки полиуретан изоляцияли қувурлар;
об-ҳавога боғлиқ автоматик тартибга солинадиган индивидуал иситиш пунктлари (ИИП).
Қозонхоналар қуриш жараёни
© Veolia Energy Tashkent
"Лойиҳани фойдаланишга топшириш, келгусида самарадорлик кўрсаткичларини баҳолаш билан, 2024 йилнинг 2-чорагига мўлжалланган", дейилади хабарда.
Қозонхоналар
© Veolia Energy Tashkent
Ёпиқ тизимнинг афзалликлари
Очиқ иссиқлик таъминоти тизими билан сув шаҳар қозонхоналарида иситилади ва истеъмолчиларга этказилади. Ташиш жараёнида иссиқликнинг бир қисми йўқолади.
Ёпиқ иссиқлик таъминоти тизими билан кўп қаватли уйлар ва ижтимоий объектлар янги иссиқлик таъминоти схемасига уланади, бунда сув тўғридан-тўғри объектда иситилади. Бунинг учун ҳар бир объект ташқи ҳароратни ҳисобга олган ҳолда иссиқлик энергиясини тартибга солувчи бўғлама билан жиҳозланади.
Лойиҳанинг амалга оширилиши иссиқлик таъминоти самарадорлигини ошириш ва иссиқлик йўқотишларини сезиларли даражада камайтириш имконини беради.
Қозонхоналарнинг умумий лойиҳа қуввати: 48 МВт ёки 41,4 Гкал/соатга тенг.
Ёпиқ иситиш тизимига ўтиш қуйидаги натижаларни беради:
пилот туманларда замонавий ва ишончли иссиқлик таъминоти тизимини яратиш;
энергия ресурсларидан самарали фойдаланиш (газ, электр, совуқ сув);
совуқ даврда истеъмолчиларнинг биноларида қулай ҳароратни яратиш;
сифатли иссиқ сув билан таъминлаш.