ТОШКЕНТ, 8 июн — Sputnik. Таиландда ўтказилаётган велошоссе бўйича ёшлар ва катталар ўртасидаги Осиё чемпионатининг учинчи кунида Ўзбекистон терма жамоаси учинчи медалини қўлга киритди. Бу ҳақда Миллий олимпия қўмитаси хабар берди.
Ёшлар ўртасида индивидуал вақт пойгаси дастурида иштирок этган ўзбекистонлик Асал Ризаева иккинчи натижани қайд этиб, кумуш медалга сазовор бўлди.
15 километрга кечган пойгада Ризаевадан 4 сония яхшироқ натижа қайд этган вьетнамлик Ти Бе Нгуен олтин медални қўлга киритди, Хитой Таипейи вакиласи Чеук Там эса шоҳсупанинг учинчи поғонасидан жой олди.
Эслатиб ўтамиз, бу Ўзбекистон терма жамоасининг мусобақадаги учинчи медали. Биринчи кун доирасида ўтган эстафета йўналишида терма жамоа кумуш ва бронза медалларини қўлга киритган эди.
Мусобақа U-18, U-23 ва катталар ўртасида ўтказилмоқда. У 13 июнга қадар давом этади.