ТОШКЕНТ, 1 июн — Sputnik. Россия қўшинлари ФСБ бўлинмалари билан биргаликда украиналик жангариларнинг Белгород вилоятига бостириб кириш ва тинч аҳолига қарши теракт уюштиришга қаратилган учта уринишини қайтарди, деб хабар берди Мудофаа вазирлиги. РИА Новости хабарига асосан.
“Москва вақти билан соат 03:00 атрофида Белгород вилоятидаги тинч аҳоли объектларини интенсив ўққа тутгандан сўнг, Украина террорчилик тузилмалари танклар билан мустаҳкамланган иккита мото-ўқчи отрядидан иборат кучлари Россия Федерацияси ҳудудига бостириб киришга уриндилар. Новая Таволжанка аҳоли пункти ва Шебекино халқаро автомобиль назорат пункти ҳудудида", - дейилади хабарда.
Операция давомида Ғарбий ҳарбий округ авиацияси душманга 11 марта зарба берди, ракета қўшинлари ва артиллерия 77 та ўт очиш нуқталарини бостириш миссиясини амалга оширди ва оғир артиллерия тизимларидан икки марта зарба берди. Фаол ҳаракатлар душманни орқага суришга имкон берди, давлат чегарасини бузишга йўл қўйилмади.
"30 дан ортиқ украиналик террорчи, тўртта зирҳли жанговар машина, "Град" реактив тизими, битта пикап йўқ қилинди", - дея хулоса қилди Мудофаа вазирлиги.
Украина томони кеча тунда чегарадан тўрт километр узоқликда жойлашган 40 минг кишилик Шебекино шаҳрини интенсив ўққа тута бошлади. Белгород вилояти губернатори Вячеслав Гладковнинг сўзларига кўра, ҳеч ким ҳалок бўлмаган, камида саккиз киши жароҳатланган. Шаҳарда электр таъминоти узилган, ётоқхона ёниб кетган, маъмурият биноси шикастланган. Сўнгги кунларда Шебекино деярли узлуксиз оммавий ўққа тутилди. Маҳаллий маъмурият маълумотларига кўра, кечагина Шебекинода 37 та кўп хонадонли ва 29 та хусусий уй, 70 дан ортиқ автомобиль шикастланган.