ТОШКЕНТ, 11 май — Sputnik. Тошкентда 12-14 май кунлари “Қаҳва ва чой-2023” фестивали бўлиб ўтади. Бу ҳақда Макон фестиваллар уюшмаси маълум қилди, дея хабар берди Sputnik мухбири.
Тошкентнинг "Next Mall" хиёбонида “Қаҳва ва чой-2023” фестивали бўлиб ўтади. Унда меҳмонлар қаҳва, салқин ичимликлар, какао, смузи ва бошқа муаллифлик ичимликларини татиб кўришлари мумкин.
Айтилишича, тадбирда Россия, Беларусь, Туркия, Озарбайжон, Малайзия ва бошқа кўплаб мамлакатлардан меҳмонлар иштирок этади.
Дастурда "Tea&Coffee Expo" кўргазмаси, қаҳва ва чой дамлаш учун аксессуарлар, асал, муррабболар ва хунармандчилик асарлари кўргазма-ярмаркалари ташкил этилади.
Шунингдек, Тошкент барменлар уйи томонидан бариста ва барменлар чемпионати бўлиб ўтади. Унда ғалаба қозонган бариста - Италиянинг Болонья шахрида бўлиб ўтадиган чемпионатга йулланма олади.
Қолаверса, семинарлар, маърузалар, маҳорат дарслари ва дегустациялар, бариста касби тўғрисида давра суҳбати ва Ўзбекистон йога федерацияси томонидан очиқ йога машғулотлари ҳам ўтказилади.