ТОШКЕНТ, 11 май — Sputnik. Покистон Олий суди собиқ бош вазир ва “Адолат учун ҳаракат” (“Теҳрики Инсаф”) партияси етакчиси Имрон Хонни ҳибсга олиш тўғрисидаги қарорни ноқонуний деб топди. Бу ҳақда Geo TV телеканали хабар бермоқда.
Телеканал хабарига кўра, суд сиёсатчини зудлик озод қилиш тўғрисида қарор қабул қилган.
Аввалроқ Покистонда норозилик намойишчиларининг полиция билан тўқнашувлари оқибатида ҳалок бўлганлар сони ўн кишига етгани хабар қилинган эди.
Покистон шаҳарларида норозилик намойишлари 9 май куни собиқ бош вазир ва “Адолат учун ҳаракат” (“Теҳрики Инсаф”) партияси етакчиси Имрон Хоннинг “Ал-Қодир” иши бўйича ҳибсга олинишидан кейин бошланиб кетди. Тергов маълумотларига кўра, собиқ бош вазир рафиқаси ва партияси етакчилари билан “Ал-Қодир университети” учун траст ташкил этишган ва ўз хатти-ҳаракатлари билан давлат бюджетига 50 миллиард рупийлик зарар етказишган.