ТОШКЕНТ, 10 май — Sputnik. Бугун Тошкент мезбонлик қилаётган бокс бўйича эркаклар ўртасидаги жаҳон чемпионатининг чорак финал жанглари ўтказилди.
Ярим финал чиптаси учун рингга кўтарилган Ўзбекистон терма жамоасининг 11 нафар вакилидан 9 нафари ғалаба қозонди.
Биринчи бўлиб жанг қилган Ҳасанбой Дўсматов (-51 кг) амалдаги чемпион япониялик Томоя Субоини мағлуб этиб, ярим финалга йўл олди.
Абдумалик Халоков иорданиялик Ишиш Юсуф устидан қийинчиликсиз ғалаба қозониб, жаҳон чемпионатининг медалини нақд қилди.
Руслан Абдуллаев -63.5 кг вазн тоифасида ярим финал йўлланмасига сазовор бўлди. Жаҳон чемпионати дебютанти чорак финалда франциялик Лоунес Хамроуидан устун келди.
-71 кг вазн тоифасида иштирок этаётган Саиджамшид Жафаров россиялик Игорь Свиридченков устидан ғалаба қозониб, ярим финал йўлланмасига эга бўлди.
Оғир вазн тоифасидаги умидли ўзбек боксчиларидан бири Лазизбек Мулложонов (-92 кг) мусобақадаги сенсациялардан бирига муаллифлик қилди. У икки карра Олимпиада чемпиони, 5 карра жаҳон чемпиони кубалик Хулио Ла Крусни бу мусобақада медалсиз қолдирди
Ойбек Жўраев (-54 кг) ЖЧ чорак финалидаги жангини испаниялик Габриэль Эскобарга қарши ўтказди ва ғалабага эришди.
Мужибилло Турсунов (-60 кг) россиялик боксчи Всеволод Шумковга қарши рингга кўтарилди. У номдор рақибига муносиб қаршилик кўрсатди, бироқ имкониятни бой берди.
Мужибилло Турсунов
© НОК Узбекистана
Асадхўжа Мўйдинхўжаев (-67 кг) кубалик кучли рақиб - Рониэль Иглесиасга қарши жанг ўтказди ва 4:3 ҳисобида ғалабага эришди.
Ўзбекистон терма жамоасининг бу мусобақадаги энг ёш боксчиси Аълохон Абдуллаев (-75 кг ) бу гал венгриялик Филип Акилов устидан ғалаба қозониб, ярим финалга чиқди.
Шоҳжаҳон Абдуллаев (-86 кг) амалдаги чемпион озарбайжонлик Алфонсо Домингезга имкониятни бор берди.
Шохжахон Абдуллаев
© НОК Узбекистана
Энг оғир вазн тоифасида (+92 кг) Токио-2020 Олимпиадаси чемпиони Баҳодир Жалолов чорак финалда азалий рақибларидан бири қозоғистонлик Камшибек Конкабаев билан тўқнаш келди. Муросасиз кечган баҳсда Жалолов ярим финал йўлланмасини қўлга киритди.
Баходир Жалолов
© НОК Узбекистана
Шу тариқа, бокс бўйича жаҳон чемпионатининг ярим финалида 9 нафар Ўзбекистон вакили медаль учун кураш олиб боради.
Тошкентда 30 апрелдан буён ўтказилиб келаётган бокс бўйича эркаклар ўртасидаги ЖЧ 14 майга қадар давом этади. 11 май куни ярим финал, 12-14 май кунлари финал жанглари ўтказилади.