ТОШКЕНТ, 4 май — Sputnik. Бухоро шаҳар 3-сонли иссиқлик таъминоти қозонхонасида ва Муборак ИЭМ корхонасида энергосамарадор газ турбиналари қурилади. Бу ҳақда “Иссиқлик электр станциялари” хабар берди.
Шартнома Германия-Ўзбекистон бизнес форуми доирасида “Иссиқлик электр станциялари” ва “Siemens Energy” компанияси ўртасида имзоланди.
© Foto : АО "Тепловые электрические станции"
“Мазкур лойиҳа доирасида 72 млн евро миқдорида шартнома тузилди. Унда ҳар бирининг қуввати 54 МВтга тенг бўлган иккитадан, жами 4 та газ турбина ўрнатилади”, - дейилади хабарда.
Бухоро ва Муборак шаҳарларида ушбу қурилмаларнинг ишга туширилиши мамлакатда ишлаб чиқариладиган электр энергиясининг умумий қувватини 216 МВтга оширади.
Дастлабки ҳисоб-китобларга кўра, бу йилига 1,7 млн кВт.соат электр энергияси ва 1,5 млн Гкал иссиқлик энергиясини ишлаб чиқариш имконини беради. Шунингдек, 80 та янги ишчи ўринлари яратилади.