ТОШКЕНТ, 10 апр — Sputnik. Россия ташқи агрессия бўлган тақдирда Беларусни ўз ҳудудидек ҳимоя қилишни кафолат бериши керак. Бу ҳақда Беларусь раҳбари Александр Лукашенко Россия мудофаа вазири Сергей Шойгу билан учрашувда маълум қилди.
“Умуман олганда бу музокараларда (Россия президенти Владимир Путин билан – таҳр.) шундай янградики, Беларусга нисбатан агрессия бўлган тақдирда Россия Федерацияси Беларусни ўз ҳудудидек ҳимоя қилади. Бизга мана шундай хавфсизлик кафолатлари керак. Бизга қардош Россиядан тўлиқ хавфсизлик кафолатлари лозим”, - деди Лукашенко.
Беларусь раҳбарининг сўзларига кўра, Путин музокараларда шу нуқтаи назардан “Беларусь ва Россиянинг барча шартнома ва битимларини текшириш, Беларуснинг тўлиқ хавфсизлигини таъминлаш мақсадида давлатлараро хусусиятга эга қандай норматив ҳуқуқий ҳужжатни қабул қилиш кераклигини кўриб чиқиш зарурлигини” таъкидлаган.
Лукашенконинг қайд этишича, Ғарб мамлакатлари Будапешт меморандуми доирасида ядро қуролини чиқариш эвазига берилган хавфсизлик кафолатлари тўғрисидаги келишувларини бажаришмаяпти.
“Агар улар бизга, Россияга қарши санкция киритаётишган бўлса, қандай иқтисодий хавфсизлик бўлиши мумкин! Шу боис мен бу масалани Россия президенти билан музокараларда кўтардим. У мени барча йўналишларда мутлақо қўллаб-қувватлади”, - деди Беларусь етакчиси.