ТОШКЕНТ, 9 апр — Sputnik. Туғма юрак нуқсонини жарроҳлик амалиётисиз даволаса бўладими? Ушбу саволга тиббиёт фанлари доктори, профессор Ҳакимжон Абролов жавоб берди.
Таъкидланишича, туғма юрак нуқсонларининг турлари жуда кўп. Шу боис даволаш ишлари касалликнинг турига қараб белгиланади.
“Фарзанди ушбу хасталик билан туғилган кўпчилик ота-оналарда вақт ўтгач, касаллик ўз-ўзидан ёпилиб кeтади, дeган тушунча бор. Тўғри, айрим нуқсонлар ёпилиб кeтиши мумкин. Хусусан, очиқ артериал проток — шундай турлардан бири”, - деди профессор.
Қайд этилишича, бола олти ойлик бўлгунича, организмдаги физиологик ўзгаришлар туфайли бу туғма юрак нуқсон тури кичик ҳажмда бўлса, ўз-ўзидан ёпилиб кетиш имкони бўлади. Бироқ ҳаммаси эмас. Шу боис туғма юрак нуқсони аниқлангандан сўнг, уни “ўзи яхши бўлиб кетади” дея кутиш ва асоратлари чуқурлашиб, опeрация қилиб бўлмайдиган ҳолга олиб кeлмаслик зарур.
Профессорнинг айтишича, бу дардни фақат жарроҳлик амалиёти билангина даволаш мумкин. Шу боис касалликни эрта аниқлаб, доимий назоратда бўлиш мақсадга мувофиқ.