ТОШКЕНТ, 3 апр — Sputnik. Россия президенти Владимир Путин Мустақил Давлатлар Ҳамдўстлиги (МДҲ) давлатларининг ҳарбий хизматчиларини пенсия билан таъминлаш тўғрисидаги битимни денонсация қилиш (шартномадан чиқиш) тўғрисидаги қонунни имзолади. РИА Новости хабарига асосан.
Бундан олдин эълон қилинган тушунтириш хатига кўра, ушбу битим МДҲ ҳарбий хизматчилари хизмат қилган барча йиллар учун айни дамда яшаётган давлатидан тўлиқ пенсия олиш ҳуқуқини беради. Россия Федерациясида ҳарбийлар пенсиялари миқдори энг юқори бўлгани сабабли МДҲнинг бошқа давлатларида яшаётган ҳарбий пенсионерларнинг Россияга қалбаки миграцияси кузатилмоқда. Оқибатда амалда хорижий давлатлар ҳарбийларига Россия бюджетидан нафақа тўланмоқда.
Қонунда алоҳида қайд этилишига кўра, Россия Федерацияси ҳудудида хизмат қилган ҳарбийлар қайси давлатда яшамасин, пенсияларини тўлиқ олишда давом этади.
Маълумот учун, ушбу шартнома МДҲ давлатлари аъзолари орасида 1992 йилнинг 15 майида Тошкент шаҳрида имзоланган эди. Унга кўра, Ҳамдўстликка аъзо давлатларнинг ҳарбий хизматчилари ва уларнинг оила аъзоларини пенсия билан таъминлаш ҳамда ҳарбий хизматчиларни давлат суғуртаси билан таъминлаш тартиби белгиланган. Шунингдек, шартнома МДҲ Чегара қўшинлари ҳарбий хизматчилари, уларнинг оила аъзоларини пенсия билан таъминлаш ва суғурталашни ҳам назарда тутади.