ТОШКЕНТ, 7 мар — Sputnik. Наврўз байрами муносабати билан 2023 йил 19-23 март кунлари аҳолининг дам олиш кунларини мароқли ташкил этиш ҳамда ички туризм йўналишида саёҳатларга жалб қилиш мақсадида республика бўйлаб чегирмалар жорий этилди. Бу ҳақда Маданият ва туризм вазирлиги маълум қилди.
Маданий мерос агентлиги ҳам байрам кунларида агентлик тизимидаги давлат музейи ҳамда дирекцияларнинг чипталарига 10 фоиз чегирма берилишини эълон қилди.
Шу билан бирга, "Вақф" хайрия жамоат фондига қарашли ва пуллик кириш чипталари жорий қилинган маданий мерос объектларида (зиёратгоҳ ва қадамжолар) 18–22 март кунлари кириш чипталар нархига катталар учун 20 фоизлик ҳамда ёшлар учун 50 фоизлик чегирмалар эълон қилинди.
Аввалроқ "Uzbekistan Airways" Наврўз байрами муносабати билан чегирма эълон қилгани хабар қилинган эди.