ТОШКЕНТ, 1 мар — Sputnik. Ўзбекистонда февраль ойида истеъмол секторидаги товарлар ва хизматлар ўртача 0,5 фозизга ошган, дея хабар берди Статистика агентлиги матбуот хизмати.
Маълумотларга кўра, 2023 йилнинг февраль ойида истеъмол секторидаги товарлар ва хизматлар ўртача 0,5 фоизга ошган. Истеъмол секторидаги нархларнинг йиллик ўсиш даражаси 12,2 фоизга етган.
Таъкидланишича, 2023 йилнинг февраль ойида нархлар ва тарифлар ўсишида етакчи ўринларни озиқ-овқат маҳсулотлари эгаллаб, ой давомида уларнинг нархлари ўртача 0,7 фоизга ошган.
Бу даврда ноозиқ-овқат товарлари нархлари 0,3 фоизга ва аҳолига пуллик хизматлар кўрсатиш 0,5 фоизга ошгани кузатилган.
Январь ойида истеъмол секторидаги товарлар ва хизматлар ўртача 0,8 фоизга ошганди. Йилнинг биринчи ўттиз кунлигида ҳам нархлар ва тарифлар ўсишида етакчи ўринларни озиқ-овқат маҳсулотлари эгаллаб, ой давомида ўртача 1 фоизга ўсгани кузатилган.
Маълумот учун, 7 февраль куни Ўзбекистон президенти Шавкат Мирзиёев ҳузурида бўлиб ўтган мажлисда Ўзбекистонда 2022 йилда инфляция даражаси 12,3%ни ташкил этгани қайд этилган эди ва президент томонидан 2023 йилда инфляция миқдорини 10%дан пастга тушириш вазифаси қўйилган эди.