ТОШКЕНТ, 1 мар — Sputnik. Ўзбекистонда 18-40 ёшли 12,6 миллион аҳоли профилактик кўрикдан ўтказилади. Бу ҳақда 28 февраль куни президент томонидан имзоланган тегишли фармонда назарда тутилган.
Ҳужжатга мувофиқ, шу йилнинг ўзида 30 та оилавий поликлиника, 110 та оилавий шифокор пункти ва 520 тагача ихчам маҳалла тиббиёт пунктлари ташкил этилади.
Шунингдек, 40 ва ундан катта ёшдаги сурункали касаллиги бўлмаган 6,3 миллион нафар киши юрак қон-томир касалликлари ва қандли диабет, 3 миллион аҳоли онкологик касалликларни эрта аниқлаш бўйича скрининг текширувларидан ўтказилади.
Спинал мушак атрофияси билан касалланган 112 нафар бола дори воситалари билан таъминланади.
Эшитиш заифлиги мавжуд бўлган 250 дан ортиқ болаларда кохлеар имплантация операциялари ўтказилади. Қолаверса, бундай амалиётлар бажарилган 132 нафар болада нутқ процессорлари алмаштирилади.