ТОШКЕНТ, 21 фев — Sputnik. Россиянинг “Аэрофлот” авиакомпаниясига тегишли Бангкокдан Москвага учаётган самолёт ёқилғи қуйиш учун Тошкентга қўнишга мажбур бўлди. Бу ҳақда Uzbekistan Airports хабар берди.
Аэрофлотнинг Бангкокдан Москвага учган AFL273 рейси 20 февраль куни соат 18.57 да Тошкент аэропортига қўнди.
“Самолёт экипажи ёқилғи қуйиш учун пойтахтдаги муқобил аэродромга қўнишга қарор қилди”, дейилади хабарда.
Бортида 400 нафар йўловчи бўлган лайнернинг қўниши нормал режимда амалга оширилган.
Қайд этилишича, ёқилғи қуйишдан сўнг ҳаво кемаси белгиланган аэропортга парвозни давом эттиради.