ТОШКЕНТ, 15 фев — Sputnik. Тошкентда февраль ойида бўлиб ўтиши кутилаётган Ўзбекистон-Озарбайжон минтақалараро биринчи форумида ҳамкорликда автомобиллар ишлаб чиқариш масаласи муҳокама қилинади. Бу ҳақда Sputnik мухбири маълум қилди.
Озарбайжон мултимедиа матбуот марказида Ўзбекистон-Озарбайжон ҳудудлараро биринчи форуми иштирокчилари олдида турган долзарб вазифалар мавзусига бағишланган Боку-Тошкент видеокўприги бўлиб ўтди.
Озарбайжон Миллий фанлар академияси Иқтисодиёт институти етакчи илмий ходими Эмин Маммадзода қайд этишича, Тошкентда ўтказиладиган Ўзбекистон-Озарбайжон ҳудудлараро биринчи форумида биргаликда автомобил ишлаб чиқариш масаласи муҳокама қилинади.
Унинг сўзларига кўра, Озарбайжонда ўзбек автомобилларига талаб юқори, шунинг учун биргаликда ишлаб чиқариш катта истиқболга эга бўлади.
“Ўзбекистоннинг бу борадаги салоҳияти катта. Барчамизга маълумки, Ўзбекистонда автомобиль заводи узоқ вақтдан бери фаолият юритиб, дунёнинг кўплаб мамлакатларига экспорт қилмоқда. Озарбайжонда автомобилларга талаб ошди. Табиийки, биргаликда автомобил ишлаб чиқариш катта истиқболга эга бўлади ва бу масала бўлажак минтақалараро форумда муҳокама қилинади”, -дейди Маммадзода.
Маълумот учун, Тошкент шаҳрида 23-24 февраль кунлари Ўзбекистон-Озарбайжон ҳудудлараро биринчи форуми бўлиб ўтади. Форумда икки давлат мутасаддилари, иқтисодиётнинг турли тармоқларида фаолият юритаётган тадбиркорлар иштирок этади. Шунингдек, форум доирасида Ўзбекистон-Озарбайжон ишбилармонлар кенгашининг учинчи йиғилиши ҳамда тадбиркорларнинг икки томонлама учрашувлари ўтказилади.