Самарқанд туризм маркази ва Индонезия туристик уюшмаси ўртасида меморандум имзоланди

Тадбир Ўзбекистон элчихонаси ва Индонезиянинг Ҳалол турмуш тарзи маркази билан ҳамкорликда ташкил этилди.
Sputnik
ТОШКЕНТ, 7 фев — Sputnik. Жакартада Ўзбекистон ва Индонезия туризм, бизнес ва маданият анжумани ўтказилди. Бу ҳақда “Дунё” АА хабар берди.
Тадбир Ўзбекистон элчихонаси ва Индонезиянинг Ҳалол турмуш тарзи маркази билан ҳамкорликда ташкил этилди. Унда индонезиялик зиёратчиларни Ўзбекистон сайёҳлик масканларига жалб қилиш, биргаликда чартер рейсларни амалга ошириш ва ўзаро манфаатли шерикликнинг бошқа масалалари юзасидан келишиб олинди.
“Ўзбекистон туристик агентликлари ва Индонезиянинг ҳаж ва умра дастурларига ихтисослашган “ASITA”, “ASTINDO”, “Sapuhi”, “Amphuri” ассоциациялари билан ҳамкорлик истиқболлари муҳокама қилинди”, - дейилади хабарда.
Тадбир доирасида, шунингдек, Самарқанд туризм маркази ва “ASITA” туристик уюшмаси ўртасида ҳамкорлик меморандуми имзоланди.