ТОШКЕНТ, 5 фев — Sputnik. Афғонистонга темир йўл орқали юкларни ташишни ташкил этиш бўйича янги шартнома келаси ҳафтада имзоланиши мумкин. Бу ҳақда “Ўзбекистон темир йўллари” матбуот хизмати хабар берди.
Матбуот хизмати маълумотларига кўра, 2022 йил декабрь ойида “Сўғдиёна транс” ШК ва Афғонистон темир йўллари ўртасида янги шартнома шартлари Афғонистоннинг махсус комиссияси билан кўриб чиқилиб, келишилган.
Таъкидланишича, Афғонистон томони Ҳайратон станциясида амалга оширилиши лозим бўлган техник ишларни ўзлари томонидан белгиланган муддатларда амалга ошира олмагани тўғрисида хеч қандай тушунтириш бермаяпти.
Бундан ташқари, Афғонистон темир йўл бошқармаси Ҳайратон станциясига етказиб берилган вагонларни бўшатиш ва қайтариш ишларини ташкил этиш учун “Мансор Фатеҳ” компанияси билан шартнома имзолаган. Ташкилот келишилган муддат - 31 январга қадар Ҳайратон станциясида ишларни ташкиллаштиришга улгурмаган.
“Афғонистон темир йўл бошқармаси раҳбариятининг илтимосига кўра, кейинги хафта бошида Термиз шаҳрида Афғонистонга темир йўл орқали юкларни ташишни ташкил этиш, Ҳайратон станциясига етказиб бериш ва олиб чиқишни ташкил этиш бўйича “Сўғдиёна транс” ШК ва Афғонистон темир йўл бошқармаси ўртасида янги шартнома имзоланиши режалаштирилмоқда”, - дейилади хабарда.
Янги шартнома имзолангандан сўнг Ғалаба-Ҳайратон темир йўли очилади.