Сенат ва БАА Федерал миллий кенгаши меморандум имзолади – ҳамкорлик режалари

ТОШКЕНТ, 4 фев — Sputnik. Олий Мажлис Сенати ва БАА Федерал миллий кенгаши ўртасида ҳамкорлик меморандуми имзоланди. Бу ҳақда Сенатнинг ахборот хизмати хабар берди.

Сенат раиси Танзила Нарбаева бошчилигидаги делегациянинг БАА Федерал миллий кенгаши Раиси Сақр Ғобаш билан учрашуви бўлиб ўтди.

Мулоқот чоғида Ўзбекистон ва БАА парламентлари ўртасидаги муносабатлар изчиллигини таъминлаш, хусусан, қонун ижодкорлиги ва парламент назорати йўналишларида ҳамкорликни йўлга қўйиш юзасидан фикр алмашилди.

Шунингдек, гендер тенглик ва ёшлар масалалари бўйича ўзаро тажриба алмашиш мақсадга мувофиқ эканлиги билдирилди.

Танзила Нарбаева ўз сўзида Амирликлар парламенти билан ўзаро ҳамкорликни ривожлантириш ва “халқ дипломатияси”нинг муҳим жиҳати ҳисобланган “дўстлик гуруҳлари” фаолиятини жонлантириш лозимлигини таъкидлаб ўтди.

Суҳбат давомида Олий Мажлис Сенати Федерал миллий кенгаши билан олий даражада эришилган келишувларни амалга ошириш, тегишли қўмиталар ўртасида ҳамкорлик алоқаларини йўлга қўйиш, электрон парламент жорий этишда тажриба алмашиш каби масалалар бўйича келишиб олинди.