ТОШКЕНТ, 17 янв — Sputnik. Америка Қўшма Штатлари Украина ёрдамида Россияга зарар етказадиган ҳолатда эмас. Бу ҳақда Туркиянинг “Sabah” газетаси шарҳловчиси Бержан Тутар ёзмоқда.
“Америка Қўшма Штатлари Украина қони, ҳаёти, ҳудуди, географияси, фожиаси орқали Россияни жиловламоқчи. Aхир ўша АҚШ геосиёсий мақсадларга эришиш учун дунёга террор балосини қулатишдан тортинмади”, - дейди журналист.
Унинг ёзишича, Оқ уйнинг моҳияти Россия ва унинг дўст мамлакатларини бир-бирига қарама-қарши қўйишдан иборат бўлган “арзон тактикаси” энди натижа бера олмаяпти.
У, шунингдек, AҚШ иттифоқчилари уларнинг фаолиятидан эҳтиёт бўлаётганини, чунки Вашингтон Европа давлатларига Украина можаросини ўз фойдасига чўзиш учун босим ўтказаётганини таъкидлади.
Тутар Украина можароси Москва ва Киев ўртасидаги тўқнашув эмас, балки AҚШ ва янги, кўп қутбли дунё ўртасидаги кураш экани тўғрисидаги хулосага келган.
Украинада махсус операция бошланганидан сўнг Ғарб Москвага нисбатан санкция босимини кучайтирди, бу эса Европа ва AҚШда электр энергияси, ёқилғи ва озиқ-овқат нархларининг ошишига олиб келди. Россия президенти Владимир Путин Россияни жиловлаш ва кучсизлантириш сиёсати Ғарб учун узоқ муддатли стратегия эканлигини ва чекловлар бутун жаҳон иқтисодиётига жиддий зарба берганини айтди. Унинг сўзларига кўра, AҚШ ва унинг иттифоқчиларининг асосий мақсади миллионлаб одамлар ҳаётини ёмонлаштиришдир.