ТОШКЕНТ, 5 янв — Sputnik. Индонезия Калимантан оролидаги янги пойтахт Нусантаранинг қурилишида иштирок этишга Россиядан инвесторларни таклиф қилмоқда. Бу ҳақда Индонезиянинг Москвадаги элчиси Хосе Aнтонио Морато Таварес РИA Новости агентлигига маълум қилди.
“Ҳозир биз шаҳар қуриш босқичидамиз — келажакдаги қурилиш учун ерни тозаламоқдамиз”, деди элчи.
Унинг таъкидлашича, бўлажак пойтахт концепсияси яшил шаҳарни барпо этишдан иборат.
“Калимантанда ўрмонлар ва дарахтлар кўп, биз табиатни йўқ қилмоқчи эмасмиз, лекин табиат қўйнида янги шаҳар қурмоқчимиз. Бу борада бизга россиялик инвесторлар ёрдам бера олади”, дея қўшимча қилди элчи.
Шунингдек, у Россия университетларини университетнинг янги пойтахтдаги филиали лойиҳасида иштирок этишга таклиф қилди.
У Индонезияда рус тилини ўрганишга катта қизиқиш билдирилаётганини, кўплаб университетларда хорижий тиллар орасида рус тили ўқитиладиган факультетлар мавжудлигини таъкидлади.
Индонезия президенти Жоко Видодо 2019 йилда мамлакат пойтахтини бошқа жойга кўчириш режасини маълум қилди. Бунинг асосий сабаби ҳозирги пойтахт Жакартанинг тирбандлиги эди. Бундан ташқари, у жойлашган Ява ороли сейсмик фаол зонада жойлашган. Шунингдек, ҳар йили Жакарта денгиз сатҳидан 25 сантиметр пастга силжийди ва бир неча ўн йилликлар ичида унинг айрим ҳудудлари сув остида қолиши мумкин.