ТОШКЕНТ, 2 янв — Sputnik. 2023 йил ҳам Россия, ҳам бутун дунё ривожланишида ўнлаб йиллар давомидаги кўп нарсани белгилаб беради. Бу ҳақда Россия Давлат думаси спикери Вячеслав Володин маълум қилди.
Унинг айтишича, 2023 йил умумий ғалаба ва мамлакат фуқароларининг ҳамжиҳатлигига асосланган тараққиёт йили бўлиши керак.
“2023 йил Россиянинг, қолаверса, бутун дунёнинг кўп ўн йилликлар тараққиётидаги кўп нарсани белгилаб беради. Келгуси йил фуқароларимизнинг ҳамжиҳатлигига асосланган ҳолда, тараққиёт йили, умумий ғалаба йили бўлиши керак”, - дейди Володин.
Унинг сўзларига кўра, буни имкон қадар тезроқ амалга ошириш учун ҳар бир киши ўз ҳудудида самаралироқ ишлаши керак.
Давлат думаси спикерининг таъкидлашича, 2022 йилда Россияда тарихий воқеалар содир бўлди. Володиннинг сўзларига кўра, мамлакат фуқаролари биргаликда Россия дуч келган санкциялар ва қийинчиликларга қарши тура олди.
“Бундан ташқари, президент Владимир Путин томонидан Россия Федерацияси суверенитети ва хавфсизлигини ҳимоя қилишни таъминлаш бўйича тақдирни белгиловчи қарорлар қабул қилинди”, - деди Володин.
Унинг айтишича, 2023 йилда 2022 йилда бошланган жараёнларнинг натижалари кўринади.