ТОШКЕНТ, 5 дек — Sputnik. Буюк Британиянинг ҳукмрон Консерватив партияси раиси Назим Заҳави мамлакатнинг тиббиёт ходимларини иш ташлаш ва иш ҳақини ошиб бораётган нархларга мувофиқлаштириш талабларидан воз кечишга чақирди, чунки бу гўёки Британия жамиятидаги парчаланишни истаётган Россияга ёрдам бериши мумкин.
“Ҳозир бирлашиш ва Россия президенти Владимир Путинга бу тариқа орамизга низо сола олмаслигини англатувчи аниқ сигнал йўллаш вақти”, - деди у “Sky News” телеканалига берган интервьюсида.
Аммо Қиролликнинг ҳамширалар коллежи бош котиби Пэт Каллен Буюк Британиядаги паст маош муаммоларидан диққатни чалғитиш учун Украинадаги можаро мавзусига мурожаат қилиш ножоиз эканини маълум қилди.
Бу йил Буюк Британияда қатор касб эгалари оммавий норозилик намойишларини эълон қилишди. Расмий маълумотларга кўра, октябрда инфляция 11,1 фоизни ташкил этган ва бу сўнгги 40 йил ичидаги энг юқори кўрсаткич.
Пойтахт автобуслари ҳайдовчилари, жиноий ишлар бўйича адвокатлар, почта ходимлари оммавий иш ташлашни уюштириб бўлишди. Декабрь ойида тиббиёт ходимлари иш ташлаш акциясини уюштиришни режалаштиришмоқда.