ТОШКЕНТ, 4 дек — Sputnik. Исроил олимлари инсонларни вирус ва бактериялардан самарали ҳимоялай оладиган қурилма яратди. Уни рамзий маънода “ҳаво ниқоби” деб аташмоқда.
Қайд этилишича, мослама батарея ёрдамида ишлайди. Уни бош кийимга осон ўрнатиш мумкин. Жажжи қурилма фойдаланувчининг юзи томон соатига 30 километр тезликда ҳаво пуркайди.
“Олимлар хулосасига кўра, бундай “қалқон” одамга йўналтирилган вирусли томчиларнинг тахминан 62 фоизини, шунингдек, мослама эгасидан бошқаларга йўналган заррачаларнинг 99 фоизини тўсиб қўя олади”, дейилади хабарда.
Тадқиқот муаллифларига кўра, “ҳаво ниқоби” вирусли томчилар ва аэрозолларни блоклаб, организмнинг инфекцияларга қарши ҳимоясини оширади.
Қурилма ҳадемай оммавий ишлаб чиқарилиши ва бир неча ой ичида сотувга йўналтирилиши кутилмоқда.