ТОШКЕНТ, 30 ноя — Sputnik. Ўзбекистон Фанлар академияси Математика институти илмий ходими Рўзмат Сафаров сунъий интеллектга эга ноёб чат-бот яратди.
Smart Chatbot лойиҳаси - бу тижорат ва давлат ташкилотларида мижозларга хизмат кўрсатишни тезлаштириш, навбатда туришнинг олдини олиш ва мижозларга 24/7 хизмат кўрсатиш учун сунъий интеллектга асосланган ақлли чат-бот тизими.
“Табиий тилни қайта ишлаш соҳасида изланишни бошладим ва ҳар қандай тажриба учун ўзбек тилининг корпуси зарурлигини англадим. Гуруҳ аъзоларимиз билан биргаликда мақолалардан фойдаланган ҳолда ўзбек тилининг корпусини яратдик”, деди Рўзмат Сафаров Sputnik мухбири билан суҳбатда.
Ишлаб чиқиш гуруҳига лойиҳа раҳбари Рифқат Раҳимов, сунъий интеллектни ишлаб чиқувчи Рўзмат Сафаров ва дастурий таъминот ишлаб чиқувчиси Самариддин Қўшмуродов кирди.
Илмий ишланма корхона ва ташкилотларнинг чатларида мижозлар сўровларини қайта ишлаш, бизнес жараёнларини автоматлаштириш, ходимлар самарадорлигини ошириш ва харажатларни камайтириш имконини беради.
Ҳозирда чат-бот рус, инглиз ва ўзбек тилларида тест режимида ишлайди.
Келгусида ундан давлат тест маркази тизими, вазирликлар, тиббиёт муассасалари, мобиль алоқа компаниялари, интернет дўконларда фойдаланиш мумкин.