ТОШКЕНТ, 18 ноя — Sputnik. Туркия президенти Ражаб Тоййиб Эрдоған Канаданинг Галифакс шаҳрида бўлиб ўтадиган халқаро хавфсизлик форумида иштирок этиши керак эди, бироқ рад жавобини берди, деб ёзади “Politico” америкалик сенаторларга таяниб.
“Унинг нутқи аввалига бир қанча турк расмийларининг иштироки каби кун тартибига киритилган эди”, дейди конференциядаги конгресс делегациясига бошчилик қилаётган сенатор Жин Шаҳин.
Таъкидланишича, Эрдоған тадбирда иштирок этишдан бош тортар экан, “Украина ғалла битимини сақлаб қолиш зарурлигига” ишора қилган. Бироқ сенатор Жим Ришнинг сўзларига кўра, Эрдоған Швеция ва Финляндиянинг НAТОга киришини “кечиктиргани” учун AҚШ қонунчилари томонидан танбеҳ олишни истамаган бўлиши мумкин.
18 май куни Финляндия ва Швеция Россиянинг Украинадаги махсус ҳарбий операцияси фонида НAТО бош котибига альянсга қўшилиш учун ариза топширди. Бугунги кунга қадар Швеция ва Финляндиянинг НAТОга аризалари 30 та давлатдан фақат иккитаси томонидан ратификация қилинмаган - булар Венгрия ва Туркия.