ТОШКЕНТ, 15 ноя - Sputnik. Владимир Путин Россия Федерацияси армиясида хизмат қилиш тартиби тўғрисидаги Низомга ўзгартиришлар киритиш ҳақидаги фармонни имзолади. Ҳужжат ҳуқуқий ахборот сайтида эълон қилинди.
Эндиликда хорижликларга ҳам Россияда ҳарбий хизматни ўташ имконияти берилди.
“Ушбу қонун чет давлат фуқаролиги ёки яшаш учун рухсатномаси ёки фуқаронинг чет давлат ҳудудида доимий яшаш ҳуқуқини тасдиқловчи бошқа ҳужжатга эга бўлган фуқаролар ва хорижий давлат фуқароларининг тинчлик даврида Россия Федерацияси қуролли кучларида ҳарбий хизматни ўташ тартибини белгилайди”, - дейилади ҳужжат матнида.
Владимир Путин аввалроқ ҳарбий хизмат учун шартнома тузган хорижликларга Россия фуқаролигини соддалаштирилган тартибда олиш имконини берувчи фармонни имзолаган эди. Бу ҳуқуқ уларнинг турмуш ўртоғи, ота-онаси ва фарзандларига ҳам берилади.
Давлат раҳбарининг бошқа фармони билан хорижий фуқаролиги бўлмаган россияликлар, шунингдек, иккинчи фуқароликка эга бўлганлар Россия армиясида шартнома асосида хизмат қилиш ҳуқуқини олди.