ТОШКЕНТ, 15 ноя — Sputnik. Меҳмонхоналарга “юлдуз” бериш тартиби енгиллаштирилди. Туристик хизматларни сертификатлаштириш маркази томонидан ишлаб чиқилган янги лойиҳага кўра, аввал меҳмонхоналар учун мажбурий бўлган 97та талаб 85тагача қисқартирилди, дея хабар бермоқда Тошкент шаҳар ҳокимлиги.
Қайд этилишича, соҳа мутахассислари тўлиқ меҳмонхоналар рейтингини таснифлаш тизимини қайта кўриб чиқди. Натижада O'z DSt 3296: 2022 “Туристик хизматлар. Жойлаштириш воситалари. Таснифлашнинг баллик тизими" янги давлат стандарти лойиҳасини тайёрлади.
Қайд этилишича, меҳмонхоналар “юлдуз” олиш учун 138та талабга жавоб бериши керак. Агар талаблардан бири бажарилмаса, тегишли юлдуз тоифасини бериш рад этилади.
“Ўзбекистонда амалдаги талаблар миқдорий ва сифат жиҳатидан мақбул ва рақобатбардош бўлиб, уларнинг қисқариши ёки юмшатилиши меҳмонхоналар таснифи, нуфузи, мавқеи ва сифатининг пасайишига олиб келади”, дейилади хабарда.
Таъкидланишича, стандартда талаблар "мажбурий" ва "ихтиёрий"га бўлинади. Хизмат кўрсатиш сифати ва қулайлигига бевосита таъсир кўрсатадиган умумэътироф этилган талаблар меҳмонхоналар учун “мажбурий” ҳисобланади.
Тегишли юлдуз тоифасини олиш учун зарур бўлган балларни тўплаш учун "қўшимча" талаблар бажарилади. Тўпланган баллар йиғиндисига кўра меҳмонхона тегишли “юлдуз” тоифасини олиш имкониятига эга бўлади.