ТОШКЕНТ, 15 ноя — Sputnik. 8 ноябрь куни Ҳукуматнинг “Давлат божхона қўмитаси ҳузуридаги “Божхона-сервис” давлат муассасаси фаолиятини ташкил этиш тўғрисидаги қарори қабул қилинди.
Давлат ташкилотлари ва декларантлар учун шартнома асосида божхона декларацияси ва бошқа ҳужжатларни тузиш, давлат божхона хизмати органларига такдимэтиш ҳамда товарларга доир божхона расмийлаштируви бўйича бошқа операцияларни амалга ошириш муассасасининг асосий вазифаларидан бири этиб белгиланмоқда.
“Божхона-сервис” чегара ўтказиш пунктларини назорат-техник воситалар билан жиҳозлайди, чегара ўтказиш пунктлари ва уларга туташ худудларда автотураргоҳлар ташкил этади.
Божхона омборларида товарларни сақлаш, юклаш, тушириш хизматларини кўрсатиш ва бошқа юк операцияларини амалга оширади.
Белгиланган тартибда давлат божхона хизмати органлари томонидан олиб қўйилган ва давлат даромадига ўтказиладиган мол-мулкни сақлаш ва сотиш (қонунчилик ҳужжатларида бошқа давлат органларга бериладиган мол-мулклар бундан мустасно) ҳам “Божхона-сервис”нинг асосий вазифаларидан бири.
2023 йил 1 апрелга қадар Давлат божхона қўмитасига олиб қўйилган ва давлат даромадигаўтказиладиган мол-мулкларни электрон савдо платформалари ва савдо ярмаркалари орқали сотиш амалиётини жорий этиш чораларини кўриш топширилган.
Бундан ташқари, қабул қилиб олиш, сақлаш ва сотишгача бўлган жараёнларни “онлайн” режимда мониторинг қилиш имконини берувчи ахборот тизимини ишлаб чиқиш ва ишга тушириш вазифаси қўйилган.