ТОШКЕНТ, 13 ноя — Sputnik. Россия президенти Давлат думаси биринчи ўқишда қабул қилган фуқаролик тўғрисидаги қонун лойиҳасига тузатиш киритишни таклиф қилди. Тузатишга кўра, агар шахс “Россия Федерацияси хавфсизлигига таҳдид солувчи ҳаракатларни содир этган бўлса”, олинган фуқароликдан маҳрум қилиниши мумкин. Бу ҳақда РИА Новости хабар берди.
Ҳужжатга кўра, қарор “Россия Федерацияси хавфсизлигига таҳдид соладиган ҳаракатлар содир этилган вақтдан ва бундай ҳаракатлар факти аниқланган санадан қатъи назар” қабул қилиниши мумкин. Бундай ҳаракатлар Федерал хавфсизлик хизмати томонидан аниқланади.
Тузатиш билан берилган фуқароликни тугатиш билан жазоланиши керак бўлган жиноятлар рўйхати кенгайтирилади.
Гап Россия Жиноят кодексининг қуйидаги моддалари ҳақида бормоқда:
284.1-модда. Россия Федерацияси ҳудудида фаолиятини номақбул деб тан олиш тўғрисида қарор қабул қилинган хорижий ёки халқаро нодавлат нотижорат ташкилотда ишлаш;
207.3-модда. Россия Федерацияси Қуролли Кучларидан фойдаланиш, Россия Федерациясининг давлат органлари томонидан ўз ваколатларини амалга ошириш тўғрисида қасддан ёлғон маълумот тарқатиш;
280.1-модда. Оммавий равишда Россия Федерациясининг ҳудудий яхлитлигини бузишга қаратилган ҳаракатларни амалга оширишга чақириш;
280.3-модда. Россия Федерацияси Қуролли Кучларидан Россия Федерацияси ва унинг фуқаролари манфаатларини ҳимоя қилиш, халқаро тинчлик ва хавфсизликни сақлаш ёки Россия Федерациясининг давлат органлари томонидан ўз ваколатларини амалга ошириш мақсадида фойдаланишни обрўсизлантиришга қаратилган оммавий ҳаракатлар.
Бундан ташқари, президент томонидан киритилган ўзгартиришлар мамлакат байроғи ва гербини камситиш, пора олиш ва бериш (290 ва 291-моддалар), талончилик (161-модда), қийноққа солиш (117-модда), талончилик (162-модда), одам ўғирлаш (126-модда), товламачилик (163-модда), безорилик (213-модда), вандализм (214-модда) учун олинган фуқароликдан маҳрум этишни назарда тутади. Шунингдек, қуролли исён (279-модда), давлат ёки жамоат арбоби ҳаётига тажовуз қилиш (277-модда), экстремистик фаолиятга оммавий чақириш (Жиноят кодексининг 280-моддаси) учун олинган фуқаролик бекор қилиниши мумкин.
Россия президенти Владимир Путин Давлат думасига 2021 йил декабрида “Фуқаролик тўғрисида”ги қонунга ўзгартиришлар киритувчи ва олинган фуқароликдан маҳрум қилиш асосларини кенгайтирувчи федерал қонун лойиҳасини тақдим этганди. 5 апрель куни ҳужжат биринчи ўқишдан ўтди.
Ҳужжатнинг ушбу вариантида фуқароликни бекор қилишга асослар қаторида террористик характердаги жиноятлар, “давлатга қарши айрим оғир жиноятлар, шунингдек, гиёҳвандлик воситалари ва психотроп моддаларнинг муомаласи соҳасидаги жиноятлар” борлиги айтилган.
Қонун лойиҳаси, шунингдек, Россия фуқаролигига қабул қилиш учун 20 дан ортиқ тоифадаги шахсларга қўйиладиган талаблар сонини қисқартиради, шунингдек, президентнинг соддалаштирилган тартибда паспорт олиш ҳуқуқига эга бўлган шахслар тоифаларини белгилаш бўйича ваколатларини кенгайтиради.
Давлат думасининг МДҲ ишлари, Евроосиё интеграцияси ва ватандошлар билан алоқалар қўмитаси раиси Леонид Калашниковнинг сўзларига кўра, октябрь охиригача қонун лойиҳасига ўнлаб тузатишлар келиб тушган. Депутат ҳужжат йил охиригача қабул қилинади, деб ҳисоблаяпти.