ТОШКЕНТ, 5 ноя — Sputnik. Евроосиё тараққиёт банки (ЕТБ) “Навоий кон-металлургия комбинати” AЖ (НКМК) инвестиция дастурини молиялаштиради. Бу ҳақда Sputnik мухбирига ЕТБ матбуот хизмати хабар берди.
Дастурнинг дастлабки индикатив шартлари шу кунларда Ўзбекистонда бўлиб ўтаётган II Иқтисодий форум доирасида НКМК ва банк вакиллари томонидан имзоланди.
НКМК инвестиция дастурининг мақсади ишлаб чиқариш қуввати ва ишлаб чиқариш самарадорлигини ошириш, истиқболли конларни ўзлаштириш, экологик ва ишлаб чиқариш хавфсизлигини оширишдан иборат.
"Ўзбекистон халқаро инвесторлар учун жозибадор бозор. Бизнинг стратегиямиз ЕТБ аъзоси бўлмаган мамлакатлар лойиҳаларига сармоя киритиш имкониятини ўз ичига олади. Биз Барқарор ривожланиш мақсадларига эришиш мақсадларини ҳисобга олган ҳолда бундай лойиҳаларни молиялаштиришда катта тажриба тўплаганмиз. Шундай экан, бугун биз Навоий кон-металлургия комбинати фаолиятини янада ривожлантиришга ўз ҳиссамизни қўшиш ниятимиз борлигини мамнуният билан эълон қиламиз”, деди ЕТБ бошқаруви раиси ўринбосари Руслан Даленов.
НКМК вилоятдаги йирик саноат корхоналаридан бири ҳисобланади. Заводнинг асосий фаолияти олтин қазиб олиш ва ишлаб чиқаришдир.