ТОШКЕНТ, 25 окт — Sputnik. Франция президенти Эммануэль Макрон Рим папаси Францискдан Украинадаги инқирозни ҳал қилиш учун Россия ва Aмерика етакчилари Владимир Путин ва Жо Байденга қўнғироқ қилишни сўради, деб ёзмоқда “Point”.
Рим папаси Франциск душанба куни Ватиканда Франция президенти Эммануэль Макронни қабул қилди. Хабар қилинишича, понтифик ва Франция раҳбари ўртасидаги учрашув 55 дақиқа давом этган.
“Мен Рим папаси Францискни Владимир Путин ва Москва патриархи Кириллга, шунингдек, Жо Байденга қўнғироқ қилишга чақирдим”, деган Макрон.
Таъкидланишича, Франция раҳбари шу тариқа Рим папасидан “Украинада тинчлик ўрнатишга ёрдам беришни” сўраган.
Бунга жавобан Россия Федерацияси президенти матбуот котиби Дмитрий Песков Россия Украинадаги вазиятга ечим топиш учун AҚШ, бошқа давлатлар ва Рим папаси билан гаплашишга тайёр эканини айтди.
“Биз буларнинг барчасини америкаликлар, французлар ва понтифик билан муҳокама қилишга тайёрмиз. Яна бир бор такрор айтаман, Россия барча алоқалар учун очиқ. Aммо биз Украина музокараларни давом эттирмасликни кодификация қилганидан келиб чиқишимиз керак”, - дея қўшимча қилди у.
Эслатиб ўтамиз, Россия 24 февралдан буён денацификация ва демилитаризация мақсадида Украинада махсус ҳарбий операция олиб бормоқда. Владимир Путин унинг асосий вазифасини “Киев режими томонидан саккиз йил давомида хўрлашлар, геноцидларга учраган одамларни ҳимоя қилиш” деб атаган. Қуролли Кучлар олдида Донбассни озод қилиш ва Россия хавфсизлигини кафолатлаш турибди.