ТОШКЕНТ, 16 окт — Sputnik. Хитой Ташқи ишлар вазирлиги мамлакат фуқароларини Украина ҳудудини тарк этишга чақирди. Бу ҳақда РИА Новости Хитой давлатига қарашли “Global Times”га таяниб, хабар берди.
“Хитой Халқ Республикаси Украинада бўлиб турган фуқароларини “эҳтиёт чораларини кучайтириш ва эвакуация қилишга” чақиради, мамлакат элчихонаси эвакуация жараёнини ташкил этишда ёрдам беришга тайёр”, - дейилади хабарда.
Ҳафта бошида ХХР ваколатхонаси ватандошларини ўта зарурат бўлмаса, Украина ҳудудида қолмасликка ва хавфсиз бўлганда уни ўз вақтида тарк этишга чақирган эди. Шу билан бирга, АҚШ элчихонаси Украинани тарк этишга чақириқни эълон қилди.
Қолаверса, Ўзбекистоннинг Киевдаги элчихонаси ўзбекистонликлардан Украинани тарк этишни сўради.
Эслатиб ўтамиз, 8 октябрь куни Қрим кўприги устида юк машинаси портлатиб юборилди. Портлаш оқибатида кўприкнинг автомобиллар йўлларидан бири шикастланди, параллел йўналишда темир йўлда кетаётган поезд цистерналари ҳам зарар кўрди.
Россия президенти Владимир Путин бу ҳодисани теракт деб атади ва уни ташкиллаштиришда Украина махсус хизматларини айблади.
Шундан сўнг 10 октябрь куни Украинанинг бир неча шаҳарларида инфратузилма объектларига юқори аниқликдаги ракета зарбалари берилди. Путин Украина ҳудудидаги бундай объектларга оммавий зарба Киев режимининг жиноятларига жавоб тариқасида берилганини маълум қилди ва агар Украина ҳукумати Россия ҳудудида теракт уюштиришга бўлган уринишларини давом эттирса, Россиянинг жавоби қатъий бўлишидан огоҳлантирди.