ТОШКЕНТ, 12 окт - Sputnik. Пайшанба куни Қозоғистон пойтахтида Мустақил Давлатлар Ҳамдўстлиги Ташқи ишлар вазирлари кенгашининг йиғилиши бўлиб ўтади. Бу ҳақда республика ташқи ишлар вазирлиги матбуот хизмати хабар берди.
Тадбирда Ўзбекистон ташқи ишлар вазири Владимир Норов иштирок этмоқда.
Учрашувда, шунингдек, Сергей Лавров, Арарат Мирзоян (Арманистон), Владимир Макей (Беларус), Жеэнбек Кулубаев (Қирғизистон), Мухтор Тлеуберди (Қозоғистон), Рашид Мередов (Туркманисто), Жейҳун Байрамов (Озарбайжон) Сирожиддин Мухриддин (Тожикистон) ва МДҲ Ижроия қўмитаси раиси Сергей Лебедев иштирок этади.
Маълумки, МДҲ вазирлар кенгаши мажлисининг кун тартиби лойиҳаси анча ҳажмли бўлиб, 19 та банддан иборат. Вазирлар МДҲ доирасидаги халқаро ҳамкорлик ва ўзаро ҳамкорликнинг долзарб масалалари юзасидан фикр алмашадилар, сўнгра бир қатор ҳужжатларни имзолайдилар. Шу билан бирга, Ташқи ишлар вазирлари кенгаши кун тартибидаги 7та ҳужжат бўйича якуний қарорларни қабул қилади.
"Бундай ҳужжатлар орасида 2023 йилга мўлжалланган Мустақил Давлатлар Ҳамдўстлиги доирасида кўп босқичли ТИВлараро маслаҳатлашувлар режаси ҳам бор. Унда анъанавий равишда ташқи сиёсатни режалаштириш, Ҳамдўстлик давлатларининг БМТдаги позицияларини мувофиқлаштириш, бошқа халқаро ташкилотлар билан ўзаро муносабатларга оид мавзулар киритилган. Янги чақириқ ва таҳдидларга қарши курашиш, қуроллар назорати ва қуролсизланиш масалалари, халқаро ахборот хавфсизлигини таъминлаш соҳасида, шунингдек, ахборот соҳасида ҳамкорлик бўйича маслаҳатлашувлар ўтказиш режалаштирилган. Ундан ташқари Осиё, Африка ва Лотин Америкаси давлатлари билан билан ўзаро ҳамкорликнинг долзарб масалалари бўйича”, - деди Лебедев.
Шунингдек, вазирлар “Ҳамдўстлик спорт пойтахтлари” давлатлараро дастури тўғрисидаги низомни имзолайдилар.
"Бизда "Ҳамдўстликнинг маданий пойтахтлари" дастури аллақачон мавжуд бўлиб, у йиллар давомида ўзини энг яхши томондан намойиш қилди. Энди биз бу муваффақиятли амалиётни спорт соҳасига ҳам йўналтирмоқчимиз. Мамлакатларимизда биргаликда турли спорт ва бошқа мусобақалари ўтказишга эҳтиёж ортиб бормоқда. Бунга 2021 йилда Қозон шаҳрида биринчи марта ўтказилган МДҲ давлатлари ўйинларининг муваффақиятли амалга оширилиши ҳам ёрдам берди. Ушбу ўйинлар спорт жамоатчилигида юқори баҳоланди ва янги спорт ташаббусларини ривожлантиришга хизмат қилди" - деди МДҲ Ижроия қўмитаси раиси.
Тахминларга кўра, Ҳамдўстликнинг спорт пойтахти мақоми ҳар йили навбат билан МДҲ мамлакатларидаги шаҳарлардан бирига берилади. Шаҳарларни танлашнинг асосий мезонлари жисмоний тарбия ва спортни фаол ривожлантиришга тайёрлик, фуқаролик ташаббуслари ва ушбу соҳада халқаро ҳамкорлик бўйича таклифларнинг мавжудлиги, давлатлараро тармоқ ҳамкорлиги учун зарур шарт-шароитлар, жисмоний тарбия ва спорт тадбирларининг кенг доираси ва лойиҳалар ва зарур инфратузилманинг мавжудлиги.
Шунигдек, мажлисда ташқи ишлар вазирлари кенгаши аъзолари Болалар омбудсманлари (омбудсманлари) комиссиясини ташкил этиш тўғрисида қарор қабул қилади ва бу ҳақдаги низом лойиҳасини тасдиқлайди.
Комиссиянинг ташкил этилиши омбудсманларнинг ўзаро ҳамкорлиги ва биргаликдаги фаолиятининг янги формати учун асос бўлади ҳамда ягона халқаро мулоқот платформаси доирасидаги келгуси ҳамкорлик МДҲ ҳудудида болаларнинг халқаро сиёсати масалалари бўйича давлатларнинг саъй-ҳаракатларини бирлаштириш имконини беради.
Бундан ташқари, Вазирлар кенгаши мажлисида ёшларнинг халқаро ҳамкорлиги стратегиясини келгуси икки йиллик даврга амалга ошириш бўйича чора-тадбирлар режаси, ҳаво кучлари ва ҳарбий ҳаво кучлари учун ҳарбий кадрлар тайёрлаш соҳасида базавий ташкилот тўғрисида қарорлар қабул қилиниши режалаштирилган.
Транспорт воситалари тўғрисидаги маълумотлар базаларида мавжуд бўлган маълумотларни олиш ва тақдим этиш тартибини белгиловчи халқаро-ҳуқуқий ҳужжат лойиҳасини тайёрлаш ва келишиш бўйича давлатлараро ишчи гуруҳини ташкил этиш ҳам назарда тутилган.