ТОШКЕНТ, 12 окт — Sputnik. Президент Шавкат Мирзиёев вилоят ҳокимларига куз мавсумида кам таъминланган 500 минг хонадонга 10 тупдан мевали дарахтлар кўчатини бепул тарқатишни топширди. Бу ҳақда президент раислигида бўлиб ўтган маҳаллаларни обод қилиш масалаларига бағишланган йиғилишда маълум қилинди.
Йиғилишда “Яшил макон” умуммиллий лойиҳасининг бориши ҳам кўриб чиқилди.
Қайд этилишича, “Яшил макон” доирасида йил якунига қадар 75 миллион дона ва 2023 йил баҳор ойларида яна 125 миллион дона мевали ва манзарали кўчатлар экиш вазифаси қўйилди.
Аҳоли хонадонларида ва дала четларида кўпроқ мевали дарахтлар ва сабзавот экишни фаол тарғиб қилиши кераклиги таъкидланди.
“Дарахт ҳавас билан экилиши, халқимиз, маҳаллаларимизнинг маданиятига айланиши лозим”, - дейди президент.
Ўтган йилги тажрибадан келиб чиқиб, 20 октябрдан 1 декабргача кўчат экиш бўйича долзарб 40 кунлик эълон қилинади.