ТОШКЕНТ, 10 окт — Sputnik. Киев маъмурияти Запорожье вилоятига ҳужумга мафкуравий ва ахборот тайёргарликни бошлади, провокациялар яқин орада бошланиши мумкин, дейди “Биз Россия билан биргамиз” ҳаракати раиси, Запорожье вилояти маъмурияти бош кенгаши аъзоси Владимир Рогов.
“Зеленский режими Запорожье вилоятига қарши ҳужумга мафкуравий ва ахборот тайёргарликни бошлади. Қўшинларни фронтга олиб чиқишдан ташқари, энди Ғарб истеъмолчилари учун Запорожье вилояти ўзи нима, қандайлиги акс эттирилган роликлар оммавий равишда суратга олинмоқда. Бу уларнинг жиноий режалари учун кўпроқ қурол сўраш мақсадида қилинаётгани аниқ”, - деди Рогов РИА Новости агентлигига.
Унинг сўзларига кўра, Киев расмийлари яқин орада, максимал икки-уч ҳафта ичида провокация қилиш ёки жанговар ҳаракатларни кучайтиришга қарор қилиши мумкин.
Махсус операция давомида рус ҳарбийлари Запорожье вилоятининг Азов қисмини ва бутун Херсон вилоятини назорат остига олди, Херсон, Мелитопол ва Бердянск каби йирик шаҳарларни эгаллаб олди ва Украинани Азов денгизидан узиб олди. Ҳар икки вилоятда янги маъмуриятлар шакллантирилди, Россия телеканаллари ва радиостанциялари эфирга узатилмоқда, Қрим билан савдо ва транспорт алоқалари тикланмоқда.
30 сентябрь куни Россия президенти Владимир Путин Кремлда ДХР, ЛХР, Херсон ва Запорожье вилоятларида ўтказилган референдумлар якунлари бўйича нутқ сўзлади, шундан сўнг уларнинг раҳбарлари билан ҳудудларни Россия таркибига қабул қилиш тўғрисидаги битимларни имзолади. 5 октябрь куни Путин ушбу шартномаларни ратификация қилувчи федерал қонунни имзолади.