ТОШКЕНТ, 4 окт — Sputnik. Туркия Россиядан табиий газ етказиб бериш учун тўловларнинг бир қисмини 2024 йилгача кечиктиришни сўради. Бу ҳақда “Bloomberg” манбаларга таяниб, хабар берди.
“Туркиянинг давлатга тегишли энергия импортчиси Boru Hatlari ile Petrol Tasima AS ёки Botas тўловларнинг бир қисмини 2024 йилгача кечиктирмоқчи”, - дейилади хабарда.
Қайд этилишича, бу музокаралар муваффақиятли якунланганми ёки йўқ, ҳозирча аниқ эмас.
Нашрда ёзилишича, Туркиянинг энергия импортига қарамлиги унинг валютаси ва бюджетига босимни оширган. Йил бошидан буён турк лираси долларга нисбатан 28 фоиздан ортиқ қадрсизланди. Бу ривожланаётган бозорлар орасида Аргентина песосидан кейинги энг катта кўрсаткич бўлган.
“Bloomberg” маълумотларига кўра, август ойида Туркиянинг савдо камомади ўтган йилнинг шу ойига нисбатан икки баробардан кўпроққа ошиб, 11,2 миллиард долларга етган.
Аввалроқ, нашр Туркия президенти Ражаб Таййип Эрдоған Россия газига 25 фоизлик чегирма сўрашини ёзган эди. Кейинроқ Москва ва Анқара мамлакатга етказиб бериладиган Россия ёқилғисининг 25 фоизини рублда тўлаши тўғрисида келишувга эришди.