ТОШКЕНТ, 28 сен - Sputnik. Ўзбекистон президенти Шавкат Мирзиёевнинг қарори билан Сурхондарё вилояти ҳокими Тўра Боболовга жарима интизомий жазо чораси қўлланилди. Бу ҳақда президент матбуот котиби Шерзод Асадов хабар берди.
Қайд этилишича, чора "ўз фаолиятини давлат сиёсати ва амалга оширилаётган ислоҳотларга мос равишда ташкил этмагани, ҳокимларга қўйиладиган талабларга риоя этмасдан мажлис қатнашчиларини ҳақорат қилганлиги ва бу билан кенг жамоатчиликнинг норозилигига сабаб бўлгани учун" қўлланилган.
Шунингдек, президент қарори билан "Ўзбекчорванасл" агентлиги директори Бахтиёр Отамуродов эгаллаб турган лавозимидан озод этилди.
Отамуродовнинг ишдан кетишига Наманган вилоятига хизмат сафари пайтида меҳмонхонада содир этган номақбул хатти-ҳаракатлари ва фаолиятидаги бошқа камчиликлари сабаб бўлган.