ТОШКЕНТ, 18 сен — Sputnik. Немислар санкциялар сабабли Россия энергия ресурслари етказиб берилишининг қисқариши ортидан “мамлакатсиз қолишлари” мумкин. Бу ҳақда АҚШ собиқ президенти Дональд Трамп маълум қилди.
“Германия ҳозир кўмирга қайтмоқда, эски усулларга, бироқ уларда танлов йўқ. Улар мамлакатсиз қолишади”, - деди у Огайо штатидаги тарафдорлари митингида.
Шунингдек, Оқ уйнинг собиқ раҳбари у АҚШ президенти лавозимида бўлган вақтида ўша пайт Германия канцлери бўлган Ангела Меркелга қуйидаги сўзлар билан оқ байроқ юборганини айтди: “Агар 72 фоиз энергия ресурсларини Россиядан олаётган бўлсангиз, мана сизга оқ байроқ, чунки сиз тез таслим бўласиз”.
Маълумот учун, Ғарб давлатлари Украинадаги махсус операция фонида Россиянинг нефть ва газ экспортидан келадиган даромадларини чеклаш бўйича турли уринишларни амалга оширишда давом этмоқда. Экспертлар хулосасига кўра, углеводородлари етказиб берувчи занжирларининг узилиши Европа ва АҚШда ёқилғи ва озиқ-овқат нархларининг ошишига олиб келади ва бу жараён аллақачон бошланган.
Владимир Путин аввалроқ Россияни жиловлаш ва кучсизлантириш сиёсати Ғарб давлатлари учун узоқ муддатли стратегия эканлигини ва санкциялар бутун жаҳон иқтисодиётига жиддий зарба берганини таъкидлаган эди. Унинг сўзларига кўра, Ғарбнинг асосий мақсади миллионлаб одамлар ҳаётини ёмонлаштиришдир.