ТОШКЕНТ, 15 сен — Sputnik. Ўзбекистон Афғонистоннинг Балх вилояти Ҳайратон шаҳрида оғир шароитда яшаётган оилаларга инсонпарварлик ёрдами кўрсатди. Бу ҳақда Сурхондарё вилояти ҳокимлиги маълум қилди.
Вилоят ҳокимлиги ва мамлакатнинг Мозори-Шарифдаги консуллиги вакиллари 24 тоннадан иборат инсонпарварлик юкларини Ҳайратондаги оилаларга етказиб беришди.
120 та оилага мўлжалланган 8 турдаги зарур озиқ-овқат маҳсулотлар фуқароларга топширилган. Ёрдам ун, гуруч, ёғ, шакар каби маҳсулотлардан иборат.
Эслатиб ўтамиз, аввалроқ президент Шавкат Мирзиёев топшириғига биноан 58 тонна инсонпарварлик юклари Балх вилояти Калдор туманидаги 420 та оилага тарқатиб берилгани хабар қилинган эди.