ТОШКЕНТ, 5 сен — Sputnik. Ўқитувчи ва тарбиячиларни бепул тиббий кўрикдан ўтказиш бўйича топшириқ берилди. Бу ҳақида депутат Расул Кушербаев маълум қилди.
Депутатнинг ёзишича, Ўзбекистон қонунчилигига кўра, ушбу тизим ходимлари учун мажбурий тиббий кўрикдан ўтиш бепул ҳисобланади. Лекин турли сабаблар билан қонун талаби бажарилмай, ходимлар ўз ҳисобидан тиббий кўрикдан ўтиб келган.
Ушбу масала юзасидан Расул Кушербаев Соғлиқни сақлаш вазирининг биринчи ўринбосари Амрилло Иноятов билан мулоқотда бўлди.
Мулоқотда ССВнинг биринчи ўринбосари вилоятлардаги Соғлиқни сақлаш бошқармалари ва тиббий марказларга Халқ таълими ҳамда Мактабгача таълим тизимида фаолият кўрсатаётган ўқитувчи ва тарбиячиларни бепул тиббий кўрикдан ўтказиш бўйича топшириқлар берилганини билдирди.
“Ниҳоят қонунда кафолатланган ҳуқуқнинг амалда ҳам таъминланишига эришилаётгани бизни ҳурсанд қилмоқда. Ҳар қалай ҳаракатларимиз зое кетмабди”, дейди депутат.
Депутат шунингдек, ўқитувчи ва тарбиячиларни тезроқ бепул тиббий кўрикдан ўтишга чақирмоқда.