ТОШКЕНТ, 29 авг — Sputnik. МАГАТЭ миссиясининг Запорожье атом электр станциясига кутилаётган ташрифи Киев расмийларида ваҳима уйғотди. Бу ҳақда Запорожье вилояти маъмурияти бош кенгаши аъзоси Владимир Рогов маълум қилди.
Аввалроқ Атом энергияси бўйича халқаро агентлик (МАГАТЭ) бош директори Рафаэль Гросси ташкилот миссияси Запорожье АЭСга йўл олаётгани ва шу ҳафта етиб боришини маълум қилганди.
“Агар Киев режими уни бузмаса, ташриф шу ҳафта амалга оширилади. Зеленский ва унинг жамоаси ваҳима ичида. Ахир, агар МАГАТЭ текшируви келса, бутун дунё станцияни ким ўққа тутаётганини, Украина даврида у ерда нима учун тақиқланган тажрибалар ўтказилганини ва Запорожье вилояти аҳолиси минтақанинг Россия таркибига киришига қандай интилаётганини билиб олади”, деди Рогов.
“Запорожье вилоятидаги Энергодар ва бошқа аҳоли пунктларини ўққа тутиб, Зеленский режими аҳолидан Россия таркибида яшаш ва унинг фуқароси бўлишни танлаганликлари учун қасос олмоқда”, деди Рогов.
Махсус операция давомида Россия ҳарбийлари Херсон вилояти ва Запорожье вилоятининг Азов қисмини назоратга олди, Херсон, Мелитополь ва Бердянск каби йирик шаҳарларни озод қилди.
Ҳар икки вилоятда янги маъмуриятлар шакллантирилди, Россия телеканаллари ва радиостанциялари эфирга узатилмоқда, Қрим билан савдо ва транспорт алоқалари тикланмоқда. Вилоятлар Россия таркибига кириш режаларини эълон қилди. Бундан ташқари, саккиз йил ўтгач, Шимолий Қрим канали блокдан чиқарилди.