ТОШКЕНТ, 24 авг — Sputnik. 2022 йилнинг январь-июль ойларида Ўзбекистон хорижга қиймати 26,6 млн долларга тенг бўлган 98,1 минг тонна қовун ва тарвуз экспорт қилган. Бу ҳақда Давлат статистика қўмитаси матбуот хизмати хабар берди.
Статқўмга кўра, бу йил мамлакатда етиштирилган қовун ва тарвузлар энг кўп 5 та хорижий давлат бозорларига етказиб берилган бўлиб, экспорти ҳажми 2021 йилнинг мос даври билан солиштирилганда 44,5 минг тоннага ошган.
Дастлабки олти ойда Ўзбекистон асосан қовун ва тарвузни Қозоғистон (47 минг тонна), Россия (23,4 минг тонна) ва Қирғизистонга (14,4 минг тонна) экспорт қилган.
Беларусь (1,9 минг тонна) ва Тожикистон (9,3 минг тонна) ҳам ўзбек қовун-тарвузларини харид қилган.
2022 йилнинг дастлабки етти ойида хорижга энг кўп Тошкент (23,4 минг тонна), Фарғона (12,8 минг тонна)ва Андижон (11,4 минг тонна)вилоятлари қовун ва тарвуз сотган.