Ислом ўйинлари: Ўзбекистон умумжамоа ҳисобида 2-ўринга кўтарилди

ТОШКЕНТ, 15 авг — Sputnik. Туркияда ўтказилаётган Ислом бирдамлиги ўйинларида Ўзбекистон терма жамоаси умумий ҳисобда 26 та медаль –13 та олтин, 4 та кумуш ва 9 та бронза медалини қўлга киритди. Бу ҳақида Миллий олимпия қўмитаси хабар берди.

Ислом бирдамлиги ўйинлари тобора қизғин паллага кириб бормоқда. 15 август куни ўзбекистонлик спортчилар бир қатор спорт турларида ўз маҳоратларини намойиш этишади.

Руслан Нурудинов ўйинларда -109 кг вазн тоифасида иштирок этиб, даст кўтаришда 187 кг, силтаб кўтаришда 230 кг ва икки кураш бўйича 417 кг билан ўйинлар рекордини ўрнатди. У делегация ҳисобига 3 та олтин медални қўшиб қўйди.

Эндигина 20 ёшга қадам қўйган оғир атлетикачи Турсуной Жабборова аёллар ўртасида -87 кг вазн тоифасида кечган баҳсларда мутлақ чемпионликни қўлга киритди. Даст кўтаришда 109 кг, силтаб кўтаришда 126 кг, икки курашда 235 кг натижа кўрсатган Турсуной барча йўналишда олтин медалларни ўзиники қилди.

Мусобақада Акбар Жўраев +109 кг вазн тоифасида қатнашди. У даст кўтариш машқида 200 кг натижа қайд этиб, делегация ғазнасини яна бир олтин медал билан тўлдирди. Эътиборлиси, Акбар ҳам бу кўрсаткичи билан мусобақа рекордини ўрнатишга муваффақ бўлди.

Шарофиддин Амриддинов -102 кг вазн тоифасида катта тажрибага эга рақиблари билан кечган муросасиз рақобатда 172 кг натижа билан бронза медалини қўлга киритди.

-66 кг вазн тоифасида қатнашган Сардор Нуриллаев финалда марокашлик Абдураҳмон Боушитани мағлубиятга учратиб, олтин медаль соҳиблари қаторидан жой олди.

Нилуфар Эрмагамбетова ҳам олтин медалга сазовор бўлди. -57 кг вазн тоифасида иштирок этган қорақалпоғистонлик дзюдочи финалда жазоирлик Ямина Халатани иппон билан мағлубиятга учратди.

-73 кг вазн тоифасининг финал баҳсида Шаҳрам Аҳадов озарбайжонлик Наримон Мирзаевни мағлубиятга учратиб, олтин медаль соҳибига айланди.

52 кг вазн тоифасида иштирок этган икки нафар дзюдочи шоҳсупага кўтарилди. Диёра Келдиёрова ушбу мусобақада олтин медални қўлга киритган бўлса, Сита Қадамбоева бронза медалига сазовор бўлди.

-60 кг вазн тоифасида иштирок этган Кемран Нуриллаев финалда озарбайжонлик Балабай Ағабаевга имкониятни бой бериб қўйди ва кумуш медаль билан тақдирланди.

-63 кг вазн тоифасида баҳс олиб борган Севинч Исоқова бронза медали учун кечган беллашувда сенегаллик рақибаси устидан ғалаба қозониб, совриндорлар қаторидан жой олди.

Таэквондочи Нияз Пулатов бронза, унинг рафиқаси бадиий гимнастикачи Сабина Ташкенбаева эса 1 тадан кумуш ва бронза медалларига сазовор бўлди.

Файзулла Алимов ҳамда Нодирбек Мўминов Ислом бирдамлиги ўйинларида совриндорлар қаторидан жой олишди. Алимов ярим финалда озарбайжонлик Руслан Ҳасановга 11:12, Мўминов эса қирғизистонлик Роман Петровга 10:15 ҳисобида имкониятни бой берди ва бронза медалига эга чиқишди.

Ёш сузувчи Егор Петряков яна бир бор совриндорлар қаторидан жой олди. Куни кеча 400 метрга эркин усулда сузиш баҳсида бронза медали билан тақдирланган атлет бугун айни шу масофага комплекс дастурда кечган беллашувда ҳам учинчи натижани қайд этди.

Хуршиджон Турсунов 22.51 сония билан иккинчи, 22.72 сония қайд этган Алексей Тарасенко эса учинчи ўринни қўлга киритди. Турсуновнинг натижаси янги Ўзбекистон рекорди сифатида қайд этилди.

Рапира йўналишида аёллар ўртасида ўтказилаётган беллашувларда туркиялик рақибасига қарши баҳс олиб борган Умида Илясова имкониятни бой бериб қўйди. Шу тариқа, Илясова бронза билан тақдирланди.

Қолаверса, сабля бўйича Ўзбекистон аёллар терма жамоаси Ислом бирдамлиги ўйинларининг кумуш медал соҳибига айланишди. Жамоавий дастурда ярим финалда Туркияни 45:31 ҳисобида мағлуб этган қизлар финалда озарбайжонлик рақибаларига 34:45 ҳисобида имкониятни бой бериб, мусобақани иккинчи ўринда якунладилар.