Термизда 6 кун давом этган ўзбек ва тожик ҳарбийларининг ҳамкорликдаги “Ҳамдўстлик-2022” машғулотлари якунланди. Бу ҳақда Ўзбекистон Мудофаа вазирлиги матбуот хизмати хабар берди.
Ўзбекистон ва Тожикистон мудофаа вазирлари генерал-лейтенант Баҳодир Қурбонов ва генерал-полковник Шерали Мирзо ҳамда Сурхондарё вилояти ҳокими Тўра Боболов ва машғулотларнинг асосий босқичини кузатишди.
Машғулот режасига кўра икки давлат чегарасини бузиб кирмоқчи бўлган шартли душман тўдаларига мотоўқчи, танк, артиллерия ва бошқа жанговар бўлинмалар томонидан аниқ зарбалар берилди.
Амалий ўқув якунида икки мамлакат мудофаа вазирлари "Ҳамдўстлик—2022" ҳамкорликдаги ўқув иштирокчилари ва ташкилотчиларини эришилган ютуқлар билан табриклашди.
Жараёнларда фаол қатнашган ҳар икки давлат ҳарбий хизматчилари Ўзбекистон ва Тожикистон Мудофаа вазирликлари томонидан таъсис этилган медаллар, эсдалик нишонлари ва қимматбаҳо совғалар билан тақдирландилар.