ТОШКЕНТ, 27 июл — Sputnik. Россия Ўзбекистонга маймун чечагини аниқлайдиган тестларни юборди. Бу ҳақда Роспотребнадзор матбуот хизмати хабар бермоқда, дея ёзади РИА Новости.
Қайд этилишича, “Вектор” маркази ишлаб чиққан бу тестлар Арманистон, Қозоғистон ва Туркманистонга ҳам юборилган.
Роспотребнадзор мутахассислари ҳамкор мамлакатлардан бўлган ҳамкасблари учун маймун чечагига лаборатория ташхисини қўйиш усулларига бағишланган махсус семинарлар ташкил этишади.
Эслатиб ўтамиз, Ўзбекистонда маймун чечаги касаллиги қайд этилмаган. Касалликнинг республика ҳудудига кириб келиши ва тарқалишининг олдини олиш мақсадида “Маймун чечаги услубий қўлланмаси” лойиҳаси тайёрланган. Республика чегара-божхона постларида санитария-карантин пунктларининг иш фаолияти кучайтирилган.