ТОШКЕНТ, 18 май — Sputnik. “Азовсталь” заводи ҳудудида қуршовда қолган украиналик ҳарбийлар асирга тушишда давом этишмоқда. Бу ҳақда Россия Мудофаа вазирлиги расмий вакили генерал-майор Игорь Конашенков маълум қилди.
“Азовсталь” заводида қуршовга олинган “Азов” миллатчи бўлинма жангарилари ва украиналик ҳарбий хизматчилар асирга тушишда давом этмоқда. Ўтган сутка давомида 694 нафар жангари, жумладан, 29 нафар ярадор асирга тушди”, - деди Конашенков.
У 16 майдан буён 959 нафар жангари, жумладан, 80 нафар ярадор асирга тушганини таъкидлади. Ярадор украиналик ҳарбийлар Донецк халқ республикасининг Новоазовск касалхонасига ётқизилган.
16 май куни Россия Мудофаа вазирлиги “Азовсталь” заводи ҳудудида қуршовда қолган украиналик миллатчилар ва ҳарбийлар асирга туша бошлагани ҳақида хабар берган эди. Биринчи кун 265 нафар жангари, жумладан, 51 нафар оғир ярадор қуролини ташлаб таслим бўлган.
Россия Тергов қўмитаси матбуот хизматининг хабар беришича, терговчилар жангариларни Украина режимининг Донбасснинг тинч аҳолисига қарши жиноятлари ҳақидаги жиноий иш суриштируви доирасида сўроқ қилишади.
Эслатиб ўтамиз, Россия Қуролли кучлари ва ДХР мудофаа кучлари Мариуполь шаҳрини 7 март куни қуршаб олишган эди. 21 апрель куни Россия мудофаа вазири Сергей Шойгу шаҳар тўлиқ озод қилинганини эълон қилди, бироқ “Азовсталь” заводида украиналик миллатчи батальонининг икки мингдан ортиқ жангарилари қолаётганини таъкидлаган эди. Россия президенти Владимир Путин саноат зонасига ҳужумни тўхтатишни, аммо "ҳатто пашша учиб чиқа олмайдиган даражада” тўсиб қўйишни буюрган эди.