ТОШКЕНТ, 18 апр — Sputnik. Суд қарори билан ўз қизини айиқлар вольерига ташлаб юборган аёл Тошкент Республика кузатуви кучайтирилган руҳий касалликлари шифохонасида мажбурий даволанади. Бу ҳақда Тошкент шаҳар судлари хабар бермоқда.
Жиноят ишлари бўйича Юнусобод туман суди январь ойида Тошкент ҳайвонот боғида юз берган воқеа билан боғлиқ жиноят иши юзасидан суд жараёнини якунлаган. З.Т. Жиноят кодексининг 25,97-моддаси 2-қисми “в” бандида назарда тутилган жиноятни содир этганликда айбланган.
Суд З.Т.ни ижтимоий хавфли қилмишни ақли норасо ҳолатда содир этган деб топган. Унинг Тошкент Республика кузатуви кучайтирилган руҳий касалликлари шифохонасида мажбурий даволаниши белгиланган.
Аввалроқ Бош прокуратура қизини айиқ олдига ташлаган аёл ишини тиббий йўсиндаги мажбурлов чораларини қўллаш масаласини ҳал этишлик учун судга юборгани хабар қилинган эди. Судга оид психиатрия ва психология комплекс экспертизалари хулосаларига кўра, аёл умрбод руҳий ҳасталик билан бетобланиб келган.