ТОШКЕНТ, 7 апр — Sputnik. Қозоғистон коронавирус тарқалиши билан боғлиқ эпидемиологик вазият барқарорлашгани туфайли мамлакат чегарасини кесиб ўтиш билан боғлиқ чекловларни бекор қилади. Бу ҳақда мамлакат бош вазири матбуот хизмати хабар қилди.
11 апрелдан бошлаб Қозоғистоннинг Ўзбекистон, Қирғизистон ва Россия билан қуруқликдаги чегара ўтказув пунктларида фуқароларнинг чегарани кесиб ўтишига нисбатан киритилган чекловлар олиб ташланади.
Бундан ташқари, республика авиақатновлар орқали киришга қўйилган барча чекловлар бекор қилинади.
Шу билан бирга, чегарадан ўтишда натижаси манфий ПЗР-тест ёки коронавирусга қарши тўлиқ эмланганлик тўғрисидаги сертификатни кўрсатиш талаби сақлаб қолинади.
Эслатиб ўтамиз, Ўзбекистон ва Қозоғистон COVID-19’га қарши эмланганлик тўғрисидаги сертификатларни 18 мартдан бошлаб ўзаро тан олган.