ТОШКЕНТ, 15 фев — Sputnik. Ўзбекистон Соғлиқни сақлаш вазирлиги коронавирусга қарши эмланганларга пул берилаётгани ҳақидаги хабарларни рад этди.
Аввалроқ ижтимоий тармоқларда вакцина олган фуқароларга 750 минг сўм пул берилаётгани ҳақида хабарлар тарқалган эди.
Вазирлик коронавирус пандемияси даврида ҳеч қандай ҳақиқатга тўғри келмайдиган ва расмий манбалар орқали тасдиқланмаган уйдирма маълумотларни тарқатиш ҳоллари тез-тез кузатилаётгани таъкидлаган. Бу эса, ўз навбатида, кенг жамоатчилик орасида турли тушунмовчиликларнинг юзага келишига сабаб бўлмоқда.
“Вакцина олган фуқароларга 750 минг сўм миқдорида пул маблағи берилаётгани ҳақидаги ахборот ҳеч қандай расмий асосга эга эмас”, - дейилади хабарда.
Эслатиб ўтамиз, 15 январдан бошлаб 5 ой давомида Ўзбекистон бўйлаб коронавирусга қарши эмланган фуқаролар ўртасида “Вакцина - тўғри танлов” ютуқли ўйинлари ташкил қилинади. Ўйинлар доирасида ҳар ҳафта 35 та велосипед, 25 та телевизор, 25 та смартфон ва 25 та планшет ўйналади. Ютуқли ўйинлар ҳар ҳафта 20:30 да Zo'rTV каналида эфирга узатилади. Ҳар ойнинг сўнгги шанба кунида эса “Малибу” ютиб олиш мумкин. 15 январдан бошлаб вакцина олган барча фуқаролар автоматик равишда ютуқли ўйин иштирокчисига айланишади.